29 afbrotamenn teknir af lífi í Íran

 

 

29 afbrotamenn voru hengdir í Teheran, höfuðborg Íran, í dag, að fyrirskipun stjórnvalda. Allir höfðu þeir verið dæmdir til dauða eftir réttarhöld að sögn íranska ríkissjónvarpsins sem tilkynnti um aftökuna. Voru þeir dæmdir t.d. fyrir eiturlyfjaviðskipti, nauðganir, morð og vopnuð rán.

Aftökur fara fram reglulega í Íran en sjaldgæft er að svo margir séu teknir af lífi í einu. Írönsk stjórnvöld hafa verið harðlega gagnrýnd á alþjóðavettvangi fyrir grimmdarlega stjórnarhætti og mannúðarsamtök fjalla sérstaklega um hversu algengar aftökur séu í landinu.

Tilkynnt var samhliða fréttaflutningi af aftökunum að búast megi við að 30 manns í viðbót verði teknir af lífi á næstu vikum, sakaðir um svipuð afbrot. Stjórnvöld segja að með því að taka á erfiðum málum megi Íran verða laus við eiturlyf og glæpi. Áður hafa stjórnvöld neitað því með öllu að samkynhneigð sé til í landinu.

Frá valdatöku harðlínumanna árið 1979 hefur dauðarefsingu verið beitt í málum er tengjast morðum, nauðgunum, framhjáhaldi, vopnuðum ránum og eiturlyfjasmygli.

Amnesty International fullyrðir að 317 manns hafi verið líflátnir í Íran á árinu 2007. Aðeins í Kína fara fleiri aftökur fram í heiminum en í Íran.

Fjögurra mánaða barn gisti fangageymslur í Keflavík

Fjögurra mánaða barn gisti fangageymslur lögreglunnar í Keflavík síðustu nótt, ásamt foreldrum sínum. Þau voru handtekin á mánudagskvöld með 180 grömm af hassi í fórum sínum. Lögreglan á Suðurnesjum stöðvaði parið við reglubundið eftirlit og fann efnið við leit í bifreið þeirra.

Auk þess var leitað á heimili þeirra og þar fannst lítið magn af hassi. Voru fíkniefnin ætluð til sölu. Voru þau með barn sitt í för í söluleiðangrinum og faðirinn, sem var undir stýri, reyndist vera undir áhrifum fíkniefna. Hefur hann komið við sögu lögreglunnar áður.

Barnið gisti ásamt foreldrum sínum fangageymslur í Keflavík. Voru barnaverndaryfirvöld látin vita og fylgdust þau vel með stöðu mála. Var móðurinni gefinn kostur á að sækja dót til að geta sinnt barninu, en hún vildi ekki að það væri hjá ættingjum.

Parið var látið laust eftir yfirheyrslur eftir hádegið í dag og fór að því loknu með barnið heim. Málið er mjög óvenjulegt og litið alvarlegum augum. Rannsókn málsins stendur enn yfir.

Ástarleikir með bláókunnugum undir berum himni sífellt vinsælli í Danmörku

Fyrirbærið “dogging” sem á upptök í Englandi hefur ratað til Danmerkur, segir á dr.dk, einkum í danska skóga, á bílastæði, almenningsgarða og á strendurnar.

“Dogging” felst í því að bláókunnugt fólk hittist undir berum himni og fullnægir þörfum sínum.

dr.dk segir fyrirbærið ekki bara hafa náð til Danmerkur heldur hafi það breiðst út um alla Evrópu.

Fólk sem ekki þekkist hittist fyrst á netinu þar sem tími og staður er ákveðinn. Oftar en ekki eru valdir fjölfarnir staðir og þeim sem eiga leið um er velkomið að “kíkja”.
Orðið “dogging” kemur því ekkert við hvernig hundar elskast heldur er setningin “ég ætla út með hundinn” gjarnan notuð þegar fólk fer á þessi stefnumót.

Ástarleikir undir berum himni eru ekki nýir af nálinni, en aðferðin er ný og verður sífellt vinsælli.

“Internetið hefur haft þau áhrif að auðvelt er að ná sambandi við fólk sem hefur sömu áhugamál og maður sjálfur og ég verð vör við aukinn áhuga á þessu,” segir kynlífsfræðingurinn Lena Vedel Thinggard í samtali við dr.dk.

“Nafnleysið á netinu gerir fólki kleift að búa til hvaða ímynd sem því sýnist, en stefnumótið er í flestum tilfellum fantasía sem verður að veruleika. Sumum finnst auðveldara að sleppa fram af sér beislinu með einhverjum sem það þekkir ekkert.”
Lena segir líka að hættan á að sjást virki hvetjandi á suma.

“Áður voru það aðallega karlmenn sem sóttust eftir kynlífi án skuldbindinga en nú eru konur ekki síður áhugasamar um þetta og í dag er skiptingin milli kynjanna nokkuð jöfn. Fólk ætti samt að vera meðvitað um að þetta er hættulegur leikur. Það er alltaf áhætta að hitta bláókunnugt fólk á þennan hátt og þá er hættan á kynsjúkdómum mikil,” segir Lena Vedel Thinggard.

ÓL í Peking: Hvatt til góðrar hegðunar; drykkjulæti og fjárhættuspil harðbönnuð

 

Stjórnvöld í Peking hafa beint þeim tilmælum til áhorfenda sem munu sækja Ólympíuleikana í borginni 8.-24. ágúst að skilja áróðursborða og -spjöld eftir heima.

Líka þó menn séu ósammála stefnu stjórnvalda í stjórnmálum, trúmálum og öðrum málum.

Yfirvöld í Peking hafa lengi verið áhyggjufull vegna eigin þegna sem þau óttast að muni taka mesta glansinn af leikunum með leiðinda hegðun.

Í dag voru því gefnar út reglur fyrir áhorfendur og herferð hleypt af stokkunum undir slagorðinu “Góð hegðun - góðir leikar”.

Reglurnar í Peking eru nokkurn veginn þær sömu og voru á Ólympíuleikunum í Aþenu og Sydney, áróðursspjöld mega ekki vera stærri en tveir metrar á lengd og einn metri á breidd, en helst vilja stjórnvöld eki sjá nein áróðursspjöld í borginni, hvorki lítil né stór.

“Við biðjum fólk að vera ekki með spjöld af neinu tagi á leikunum, ekki síst til að gera öllum keppendum jafnt undir höfði,” segir Huang Keying, einn af skipuleggjendum leikanna.
“Meira að segja spjöld með áletruninni “Áfram Kína” væru óréttlát gagnvart keppendum annarra landa.”

Inni á Ólympíusvæðinu þarf sérstakt leyfi yfirvalda til að vera með spjöld tengd trúarbrögðum, pólitík, mannréttindum eða dýravernd. Þá eru fánar landa sem ekki eiga fulltrúa á leikunum bannaðir, en það mun vera til að koma í veg fyrir að fáni Tævan blakti nokkurstaðar. Fáni Tævan er harðbannaður í Kína.

“Fjárhættuspil og drykkjulæti eru líka stranglega bönnuð, en við munum leyfa regnhlífar sem voru reyndar bannaðar á Ólympíuleikunum í Aþenu,” sagði Huang.
“Fólk í mörgum löndum sækir í sólböð en hér reynum við að forðast sólina. Við munum leyfa regnhlífar, en ekki að þær verði spenntar upp á áhorfendapöllum.”
Regnhlífar eru algeng sjón í Peking í ágúst þar sem þær eru notaðar sem sólhlífar og vegna úrhellis hitaskúra.

Annað sem er frábrugðið reglunum í Aþenu er að fólk má ekki borga stórar fjárhæðir með mynt, heldur verður að nota seðla.

Undirbúningur fyrir leikana stendur sem hæst og gárungarnir senda tölvupósta á milli með myndum á borð við þessa frá Peking, þar sem enskan hefur örlítið vafist fyrir heimamönnum.

Myndirnar má sjá inn á www.engrish.com

SKULDASTAÐA LSH

Eyjan.is

Skuldastaða Landspítala gagnvart birgjum hefur versnað undanfarna mánuði og nú nema gjaldfallnar skuldir hundruðum milljóna, er haft eftir Knúti Signarssyni, framkvæmdastjóri Félags íslenskra stórkaupmanna, í Fréttablaðinu.

Knútur segir þetta afar slæmt þar sem aðgangur að lánsfé sé lítill um þessar mundir og segist hræddur um að illa geta farið fyrir sumum fyrirtækjum sem eiga viðskipti við spítalann.
Hann segir dæmi um verulega greiðsluerfiðleika fyrirtækja vegna skulda Landspítala.

Björn Zoëga, lækningaforstjóri Landspítalans, segir spítalann eiga í vanda nú eftir gott ástand fyrr á árinu en það sé vegna þess að aðrar heilbrigðisstofnanir skuldi LSH talsverða fjármuni og hafi átt í vandræðum.

Þá segir Björn verðhækkanir á lyfjum vegna gengisbreytinga skipta máli þar sem öll innkaup á lyfjum séu boðin út og útboð séu yfirleitt gengistryggð, en unnið sé að lausn á þessum málum í samvinnu við fjármálaráðuneytið.

var gaJsHost = (("https:" == document.location.protocol) ? "https://ssl." : "http://www."); document.write(unescape("%3Cscript src='" + gaJsHost + "google-analytics.com/ga.js' type='text/javascript'%3E%3C/script%3E")); var pageTracker = _gat._getTracker("UA-2112390-1"); pageTracker._initData(); pageTracker._trackPageview();

Björn vill nýtt aðsetur fyrir héraðsdóm

Björn Bjarnason dómamálaráðherra vill að stefnt sé að því að héraðsdómur Reykjavíkur fái nýtt aðsetur og hverfi frá Lækjartorgi.

Dómsmálaráðherra segir í fimmtudagsfærslu á vefsíðu sinni að reisa þurfi nýtt hús fyrir héraðsdóm, embætti ríkissaksóknara og héraðssaksóknara, auk þess sem þar yrði litið til aðstöðu fyrir millidómstig, komi það til sögunnar.

Björn fjallar um staðsetningu hérðasdóms við torgið í tengslum við opnun sýningar sem hann var viðstaddur í gestastofu vegna tónlistar- og ráðstefnuhússins, sem er að rísa við austurhöfnina í Reykjavík. Gestastofan er á 4. hæð húss við Lækjartorg og úr henni má sjá yfir hinar miklu framkvæmdir í austurhöfninni.

Einn af þeirra, sem hafa talið staðsetningu hérðasdóms við torgið óheppilega og kallað eftir líflegri starfsemi þar er Andri Snær Magnason rithöfundur, sem sagði meðal annars um hana í verðlaunatillögu sinni í hugmyndasamkeppni um miðbæ Reykjavíkur á vegum Landsbankans 2004:

“Hér er ljósmynd af gardínum sem snúa út að Lækjartorgi. Stjórnarráðið speglast í glugganum. Það skiptir engu hversu glæsilegar hugmyndir menn fá um miðbæinn og hversu mörg málþing verða haldin. Þótt Bónó og Dalai Lama kæmu með tillögur um eflingu Lækjartorgs þá er valdið í höndum þeirra sem reka Héraðsdóm Reykjavíkur. Með því að hafa dauða starfsemi á jarðhæð og draga ljótar gardínur fyrir glugga andspænis Stjórnarráðinu þá hafa menn fyrir sitt leyti gefið Lækjartorgi og mannlíf í miðbænum langt nef.

Héraðsdómur Reykjavíkur laumaðist inn í Útvegsbankahúsið þegar hann fór á hausinn. Þar sem eitt sinn var rennerí af fólki á Lækjartorgi, aðaltorgi bæjarins, lífleg starfsemi þangað sem menn áttu erindi oft í mánuði er komin þessi þunga starfsemi í hjarta, nei afsakið, hjartað er stórt, í hjarta hjarta hjarta Reykjavíkur. Þetta hús er eitt af stærstu vandamálum miðbæjarins og víti til að varast...

Eins og stendur hefur Héraðsdómur fælingarmátt. Það laðar engann að sér enda ekki tilgangur hússins. Fólk hverfur inn í þetta hús og sést síðan ekki næstu mánuði. Menn setjast ekki á tröppur hússins, steinveggir þess Austurstrætismegin taka upp sólarrými Austurstrætis, grindurnar fyrir annars fallegum gluggum gefa til kynna að eitthvað sé að óttast. Óttinn smitar viðstadda, fyllir þá hörku og löngun til að sparka í einhvern eða kasta flösku í vegginn. Þannig myndast hringrás sem viðheldur starfsemi Héraðsdóms Reykjavíkur. Ég er ekki bitur. Ég er ekki á skilorði en mér finnst þetta heldur dapurlegt.

Þegar ég segi fólki að það fari í taugarnar á mér að Héraðdómur Reykjavíkur hafi yfirtekið þetta fornfræga hús á þessum viðkvæma stað, þar sem ætti að vera verslun, safn, skóli, hótel, banki, veitingastaður eða einhver þjónusta sem krefst þess að hundrað eða þúsund manns skili sér inn og út um hússins dyr á hverjum degi, þá hvá menn og spyrja: Héraðsdómur Reykjavíkur? Húsið hefur gert sig ósýnilegt. þarna ættu menn að eiga erindi og á gardínuhliðinni eiga að vera opnir gluggar og fyrir innan eitthvað sem menn ættu að vilja sjá eða kaupa eða borga eða drekka. Þetta er ekki bara hugmynd, þetta er þjóðþrifaverkefni, brýn nauðsyn, fúlasta alvara. Í þessum gardínum kristallast vandi miðbæjarins. Þær eru banatilræði við mannlíf á Lækjartorgi.”

Umdeilt myndband með Madonnu og Britney í bígerð

Britney Spears er að reyna að koma söngferli sínum aftur á rétt ról, og í þeim tilgangi mun hún koma fram á tónleikaferðalaginu sem Madonna er að leggja upp í og ber nafnið “Sticky & Sweet”.

Britney mun þó ekki koma fram í eigin persónu heldur mun hún taka upp myndband sem verður svo sýnt á risaskjá á tónleikum Madonnu.

Madonna hefur sjálf staðfest fréttirnar og nú hefur breska slúðurblaðið The Sun komist að því hvernig myndbandið verður.

Britney og Madonna munu dansa saman í atriði sem hefur verið lýst sem “klámfengnu,” þar sem þær koma fyrst fram í múmíubúning, sem svo verður reyttur af þeim uns þær standa eftir á G-strengjum úr leðri og háum stígvélum.

“Þetta verður algjörlega klassísk Madonnu-sýning,” er haft eftir ónefndum uppljóstrara.

“Líklega meira kynæsandi en nokkuð sem hún hefur áður gert. Það verður ekkert dregið undan og þetta kemur til með að vera mjög umdeilt.”

“Það verður vafið utan af Britney og Madonnu eins og múmíum þangað til þær verða næstum því naktar fyrir utan pínulitlar nærbuxur og há stígvél. Svo munu þær dansa þétt saman og þrýsta líkömum sínum upp að hvor annarri.

“Það mun verða rifist um það hvort þetta sé kynæsandi, of langt gengið, eða bæði.

Tónleikaferðalagið mun hefjast þann 23. ágúst.

Afrakstur 44 ára betls gamallar konu í Kalkútta nam tugum þúsunda og vóg 91 kíló

Þegar hin sextíu ára gamla Laxmi Das ákvað að leggja peningana sína inn á banka í Kalkútta vógu þeir samtals 91 kíló.

Peningarnir voru afrakstur 44 ára betls Laxmi Das á götum Kalkútta.
Upphæðin var svo stór að Laxmi var velkomið að opna reikning í bankanum og fá sitt eigið kreditkort, segir á BBC.

Das hóf að betla aðeins 16 ára gömul en það sem hún hafði sparað nam tugum þúsunda.
Enn er þó ekki alveg ljóst hversu há upphæðin var þar sem allir peningarnir voru “klink” og enn er verið að telja smápeninga í þúsundatali.

Systir Laxmi Das, Asha, sagð í viðtali við BBC að Das væri ákaflega sparsöm en peningana sem hún geymdi í blikkdósum á heimili sínu hafði hún ætlað að geyma til ellinnar.

Sumt af myntinni er frá árinu ‘61 og ekki lengur í gildi, en yfirvöld hafa sagst munu taka myntina gilda þar sem gömlu konunni veiti ekki af öllum sínum aurum.

Það var lögreglan sem ráðlagði gömlu konunni að leggja peningana á banka þar sem hún býr í skúrahverfi þar sem glæpir og rán eru daglegt brauð.

Var með sofandi leðurblöku í brjóstahaldaranum í fjóra tíma

Abbie Hawkins, 19 ára stúlku frá Norwich, brá heldur í brún þegar hún uppgötvaði að leðurblaka hafði hreiðrað um sig í brjóstahaldaranum hennar.

Leðurblakan hafði sofið í brjóstahaldara Hawkins í fjóra tíma áður en hún uppgötvaði hana.

“Það var greinilegt að leðurblökunni, sem var bara ungi, leið vel og ég var með hálfgert samviskubit að vekja hana,” sagði Hawkins, sem sat við skrifborðið í vinnu sinni þegar hún varð vör við einkennilega hreyfingu innanklæða.

Leðurblökuunginn flúði undir skrifborðið en Hawkins sagðist hafa titrað frá hvirfli til ilja.

“Ég hafði fundið fyrir léttum titringi á leið í vinnuna en hélt það væri gemsinn minn í jakkavasanum, ” sagði hún. “Ég tók ekki eftir neinu þegar ég fór í brjóstahaldarann. Ég tók hann úr þurrkaranum en ég hafði fengið mér í glas kvöldinu áður og var að verða of sein.”
Vinnufélagi Hawkins náði leðurblökuunganum og sleppti honum út í náttúruna.

Hernaðarhótun frá Rússum vegna eldflugavarnasamnings!!

Rússnesk stjórnvöld hótuðu í dag að bregðast hernaðarlega við samningi Bandaríkjamanna og Tékka um uppsetningu eldflaugavarnakerfis í Austur Evrópu.

Hótun Rússa kom frá utanríkisráðuneyti þeirra rétt eftir að tilkynnt var að Condoleeza Rice utanríkisráðherra Bandaríkjanna hefði undirritað samkomulag við Tékka um að ratsjárhluti hins umdeilda eldflaugavarnakerfisins yrði settur upp í Tékklandi.

Rússar hafa jafnan sagt um kerfið að þeir álíti uppsetningu þess fjandsamlegt gagnvart þeim og sé alvarleg röskun valdajafnvægis í álfinnu.

Í tilkynningu utanríkisráðuneytisins rússneska segir: “Við neyðumst til að bregðast við, ekki með diplómatískum, heldur hertæknilegum aðferðum.” Ráðuneytið útskýrði ekki nánar hvaða aðferðir átt væri við.

Samningaviðræður við Tékka og Pólverja um uppsetningu bandaríska eldflugavarnakerfisins hafa staðið í 14 mánuði og ætlun Rice var að undirrita samkomulagið við Pólverja í sömu ferð, sem ekki varð. Pólverjar hafa reynst harðdrægir og m.a. krafist þess að Bandaríkjamenn styrkiflugher landsins. Eldflaugarnar í kerfinu eiga að vera staðsettar þar.

Bandaríkjamenn segja kerfið eiga að vera vörn gegn elsdflaugaárásum frá Miðausturlöndum, svo sem Íran en alls ekki að beinast gegn Rússum. Áformin hafa mætt andstöðu meðal almennings í Tékklandi og Póllandi.