Al-Qaeda hóta dönum!!

Hópur sem nefnir sig Site og fylgist með íslömskum heimasíðum á netinu, segir hryðjuverkasamtökin al-Qaeda hafa hótað árásum í Danmörku.

“Við höfum áður varað Dani við og gerum það aftur núna,” segir einn forystumanna samtakanna, Mustafa Abu al-Yazid, á myndbandi sem al-Qaeda birti á netinu.

“Þjóðir sem eru í krossferð til að móðga og hæðast að spámönnum okkar og Kóraninum í fjölmiðlum, setjast að í löndum okkar, stela dýrgripum og drepa bræður okkar, kalla á hefnd,” segir Abu al-Yazid.

Abu al-Yazid mun vera Egypti sem hefur verið valinn fjármálastjóri al-Qaeda .

Site segir myndbandið sent frá fjölmiðlasamtökum al-Qaeda.

Í myndbandinu sést sjálfsmorðsárásarmaðurinn sem réðst á danska sendiráðið í Islamabad og brot af sjálfri árásinni. Yazid segir þetta aðeins byrjunina ef Danir bæti ekki ráð sitt.

“Ég vara tilbeiðendur krossins í Danmörku við, og heiti því að þetta er hvorki fyrsta né síðasta árás okkar á ykkur. Ef Allah þóknast  munum við afmá ykkur af yfirborði jarðar,” segir í myndbandinu.

Mjög háþróaður fíkniefnamarkaður á Íslandi - lögregla kann enga einfalda lausn

Á Íslandi lítur út fyrir að þrífist mjög háþróaður fíkniefnamarkaður. Þrátt fyrir að lögregla leggi hald á mikið magn efna virðist það ekki hafa mikil áhrif á framboðið, segir Ari Matthíasson, framkvæmdastjóri félags- og útbreiðslusviðs SÁÁ.

Hann segir einnig í viðtali við Fréttablaðið að verð á fíkniefnum hafi ekki fylgt verðhækkunum í samfélaginu, en SÁÁ hefur í átta ár safnað upplýsingum um verð með því að spyrja alla sjúklinga sem leita sér hjálpar hjá SÁÁ hvort þeir hafi keypt efni á síðastliðnum tveimur vikum og hvað þeir hafi borgað fyrir þau.

Ari segir að jafnvel þegar stórar sendingar náist hafi það einungis tímabundnar verðhækkanir í för með sér, sem sýni að framboð og eftirspurn eftir fíkniefnum séu mjög mikil.

Karl Steinar Valsson, yfirmaður fíkniefnadeildar lögreglunnar á höfuðborgarsvæðinu, staðfestir orð Ara. Fullyrðingar og útreikningar SÁÁ um stærð fíkniefnamarkaðarins á landinu séu að öllum líkindum réttar og  markaðurinn hér virðist vera óvenju stór miðað við önnur lönd.

Hann segir þó ekki hægt að benda á einfaldar lausnir til að draga úr innflutningi fíkniefna.

Alltaf sé þó mikilvægt að borgararnir vinni með lögreglunni og komi með ábendingar um ólöglega dreifingu. Lögreglan geti þó aðeins sinnt broti þeirra ábendinga.

650 fíklar á örvandi efnum voru greindir á sjúkrahúsinu Vogi á síðasta ári.

Rannsóknir sýna að um 8% þeirra verði látnir eftir tíu ár, og að stór hluti verði með króníska sjúkdóma eins og lifrarbólgu.

Þá eru ekki tekin með þau skaðlegu áhrif sem fíkniefnaneytandinn hefur á samfélagið og fjölskyldu sína.

Ari segir um skelfilegan faraldur að ræða sem nú sé í hámarki.

Nýjar upplýsingar um að Madeleine hafi verið rænt af barnaklámhring í Belgíu

Enn koma fram nýjar upplýsingar varðandi ránið á Madeleine McCann semvar rænt í Portúgal 3. maí 2007.

Breska lögreglan mun hafa fengið upplýsingar um það í mars 2007 að Madeleine McCann hefði hugsanlega verið rænt af mönnum úr hring barnaníðinga, sem höfðu fylgst með henni í þrjá daga fyrir ránið.

Daily Telegraph og The Sun sögðu frá því í dag að tölvupóstur sem var birtur í vikunni og var hluti af gögnum málsins í vörslu portúgölsku lögreglunnar, hafi innihaldið upplýsingar um þetta.

Samkvæmt upplýsingum þessara dagblaða var tölvupósturinn sendur 4. maí frá Metropolitan-lögreglunni í London til lögreglunnar í Leicestershire, heimabæjar Madeleine, og þaðan áframsendur til Portúgal mánuði seinna.

Í tölvupóstinum, sem bæði dagblöðin birtu, segir að líklega hafi barnaklámhringur staðsettur í Belgíu pantað ungt stúlkubarn þremur dögum áður en Madeleine var rænt.

Einhver tengdur hópnum sá Madeleine og tók myndir af henni sem voru sendar til Belgíu. Hópurinn samþykkti stúlkuna og Madeleine var rænt, segir í lögregluskýrslunni.

The Daily Telegraph segir að Interpol hafi verið látið vita og beðið að rannsaka málið, en ekkert virtist hafa komið út úr því.
Í gær var sagt frá því á eyjunni að rétt eftir ránið hefði Madeleine sést í Amsterdam með portúgölskum manni og konu sem talaði með frönskum hreim.

Fjögurra mánaða barn gisti fangageymslur í Keflavík

Fjögurra mánaða barn gisti fangageymslur lögreglunnar í Keflavík síðustu nótt, ásamt foreldrum sínum. Þau voru handtekin á mánudagskvöld með 180 grömm af hassi í fórum sínum. Lögreglan á Suðurnesjum stöðvaði parið við reglubundið eftirlit og fann efnið við leit í bifreið þeirra.

Auk þess var leitað á heimili þeirra og þar fannst lítið magn af hassi. Voru fíkniefnin ætluð til sölu. Voru þau með barn sitt í för í söluleiðangrinum og faðirinn, sem var undir stýri, reyndist vera undir áhrifum fíkniefna. Hefur hann komið við sögu lögreglunnar áður.

Barnið gisti ásamt foreldrum sínum fangageymslur í Keflavík. Voru barnaverndaryfirvöld látin vita og fylgdust þau vel með stöðu mála. Var móðurinni gefinn kostur á að sækja dót til að geta sinnt barninu, en hún vildi ekki að það væri hjá ættingjum.

Parið var látið laust eftir yfirheyrslur eftir hádegið í dag og fór að því loknu með barnið heim. Málið er mjög óvenjulegt og litið alvarlegum augum. Rannsókn málsins stendur enn yfir.

Ástarleikir með bláókunnugum undir berum himni sífellt vinsælli í Danmörku

Fyrirbærið “dogging” sem á upptök í Englandi hefur ratað til Danmerkur, segir á dr.dk, einkum í danska skóga, á bílastæði, almenningsgarða og á strendurnar.

“Dogging” felst í því að bláókunnugt fólk hittist undir berum himni og fullnægir þörfum sínum.

dr.dk segir fyrirbærið ekki bara hafa náð til Danmerkur heldur hafi það breiðst út um alla Evrópu.

Fólk sem ekki þekkist hittist fyrst á netinu þar sem tími og staður er ákveðinn. Oftar en ekki eru valdir fjölfarnir staðir og þeim sem eiga leið um er velkomið að “kíkja”.
Orðið “dogging” kemur því ekkert við hvernig hundar elskast heldur er setningin “ég ætla út með hundinn” gjarnan notuð þegar fólk fer á þessi stefnumót.

Ástarleikir undir berum himni eru ekki nýir af nálinni, en aðferðin er ný og verður sífellt vinsælli.

“Internetið hefur haft þau áhrif að auðvelt er að ná sambandi við fólk sem hefur sömu áhugamál og maður sjálfur og ég verð vör við aukinn áhuga á þessu,” segir kynlífsfræðingurinn Lena Vedel Thinggard í samtali við dr.dk.

“Nafnleysið á netinu gerir fólki kleift að búa til hvaða ímynd sem því sýnist, en stefnumótið er í flestum tilfellum fantasía sem verður að veruleika. Sumum finnst auðveldara að sleppa fram af sér beislinu með einhverjum sem það þekkir ekkert.”
Lena segir líka að hættan á að sjást virki hvetjandi á suma.

“Áður voru það aðallega karlmenn sem sóttust eftir kynlífi án skuldbindinga en nú eru konur ekki síður áhugasamar um þetta og í dag er skiptingin milli kynjanna nokkuð jöfn. Fólk ætti samt að vera meðvitað um að þetta er hættulegur leikur. Það er alltaf áhætta að hitta bláókunnugt fólk á þennan hátt og þá er hættan á kynsjúkdómum mikil,” segir Lena Vedel Thinggard.

Paul Ramses í Kastljósi: Sannfærður um að hann verði drepinn í Kenya

Kastljós ræddi í gærkvöldi við Paul Ramses, sem var vísað úr landi í síðustu viku eftir að Útlendingastofnun hafnaði því að beiðni hans um að hæli sem flóttamaður hér á landi væri tekin fyrir á Íslandi.

Ramses, sem á eiginkonu og nýfætt barn sem stödd eru hér á landi, sagðist í Kastljósviðtalinu sannfærður um að hann yrði drepinn væri hann sendur aftur til Kenya. Hann sagðist vita að hann myndi lenda í höndunum á miskunarlausum stjórnvöldum og það yrðu endalokin. Hann gæti þá kvatt konu sína og litla drenginn þeirra. Hann myndi hverfa jafnskjótt og hann lenti á flugvellinum ef vitað væri að verið væri að senda hann til baka.

Ramses sagði meðal annars að þessa dagana væru að finnast yfir 500 lík í skógi í nágrenni Nairobi, sem flest væru af andstæðingum Mwai Kibakis, forseta landsins, sem nú réði herafla og öryggismálum landsins, en um þetta væri ekkert fjallað. Ramses er stuðningsmaður Raila Odingas, umdeilds mótframbjóðanda Kibakis í forsetakosningunum í landinu í byrjun þessa árs. Þeir Kibaki og Odinga fara nú saman fyrir samsteypustjórn sem mynduð var til að sætta stríðandi öfl í landinu, sem höfðu tekist á í blóðugum bardögum í kjölfar kosninganna.

Allsherjarnefnd Alþingis fjallar um mál Ramses á fundi sínum í dag.

Lögmaður Paul Ramses, Katrín Theodórsdóttir, sem ætlar að höfða mál gegn ríkinu vegna afgreiðslu málsins, sagði í þættinum að hún gæfi lítið fyrir svör setts forstjóra Útlendingastofnunar, Hauks Guðmundssonar í Kastljósi föstudaginn. Haukur sagði meðal annars að undanþágubeiðni Pauls hefði ekki verið tekin fyrir vegna ólöglegrar stöðu eiginkonu hans hér á landi. Katrín sagði það einfaldlega rangt. Eiginkonan hafi verið löglega hér á landi þegar beiðnin var lögð fram. Afgreiðsla málsins hafi hinsvegar tafist hjá útlendingastofnun.

Hún telur að vegna þess að Paul er giftur maður og á barn sem fæddist hér á landi, verði að meðhöndla mál fjölskyldunnar allrar. Eins sé rétt að skoða málið með tilliti til barns þeirra, Fidels Smára, sem fæddist á Íslandi fyrir rúmlega sex vikum. Samkvæmt barnalögum og barnasáttmála Sameinuðu þjóðanna eigi barnið meðal annars rétt á samvistum við báða foreldra.

Umfjöllunin í Kasljósi.

Læknavakt lokað á Suðurnesjum - Slasaðir og veikir þurfa til Reykjavíkur utan skrifstofutíma

 

 

Læknavakt Heilbrigðisstofnunar Suðurnesja verður lokað 16. júlí nk. vegna fjárhagsvandræða. Læknar verða ekki á vakt utan skrifstofutíma.

Haft er eftir Sigríði Snæbjörnsdóttur, forstjóra HSS á Vísir.is að sjúklingar sem þurfa þessa þjónustu eftir klukkan fjögur á daginn verði að leita til Reykjavíkur. Hún segir fjárveitingar HSS ekki vera í samræmi við fjárveitingar annarra heilbrigðisstofnana.

Læknir verður á neyðarvakt á HSS og mun sinna neyðartilvikum.  Ef neyðartilfellli ber að höndum á að hringja strax í 112, sem hefur samband við lækni á neyðarvakt.

Í fréttatilkynningu sem HSS sendi frá sér í dag og birt er á Víkurfréttum segir:

„Á fjárlögum árinu 2008 fékk Heilbrigðisstofnun Suðurnesja 1.609.800.000 kr. eða 78.734 kr. á íbúa m.v. 20.446 íbúa.  Þegar litið er á fjárveitingar til átta annarra sambærilegra stofnana m.v. íbúafjölda er þessi upphæð langlægst án frekari skýringa.  Sú heilbrigðisstofnun sem næst kom fékk 101.013 kr. á íbúa og sú sem mest fékk, var með  200.976 kr. á íbúa.  Vegna þessara erfiðleika í rekstri hefur á undanförnum mánuðum verið reynt að fá leiðréttingar á fjárveitingum  hjá heilbrigðisráðuneytinu án árangurs.

Sérstaklega eru fjárveitingar lágar á heilsugæslusviði.  Ef HSS fengi jafnháa fjárhæð og sú stofnun sem næstlægsta upphæð fær, ætti hún að fá 450.000.000 kr. í viðbót á árinu 2008.

Þessar upplýsingar voru formlega kynntar í heilbrigðisráðuneytinu í mars s.l. og síðan á fjölmörgum  fundum til að freista þess að fá leiðréttingar þannig að HSS sæti a.m.k. við sama borð og sú stofnun sem næst minnst er úthlutað.  Fullyrða má að HSS hefur verið  að veita jafngóða þjónustu og samanburðarstofnanirnar fyrir 50-75% af því fjármagni sem þeim er úthlutað.

Ekki hefur tekist að fá leiðréttingu á þessari skekkju í fjárveitingum sem skapast m. a. af mikilli og örri íbúaaukningu á Suðurnesjum á undanförnum árum.  HSS getur því ekki lengur haldið uppi lögbundinni og tilskilinni starfsemi og verður  að bregðast við með aðgerðum sem snúa að samdrætti í heilsugæslu.

Stjórnendur HSS hafa fundað að undanförnu til að komast að niðurstöðu um hvar sé hægt að draga úr þjónustu svo minnstur skaði verði.  Það þarf ekki að taka fram að að þessar umræður eru bæði erfiðar og sársaukafullar.

- Frá og með 10. júní var hraðmóttöku á heilsugæslu lokað en sú þjónusta naut mikilla vinsælda og létti mjög á annarri starfsemi heilsugæslu.

- Frá og með 16. júlí  mun heilsugæsluvakt leggjast af utan dagvinnu.  Sjúklingum verður vísað á læknavaktina í Reykjavík og á slysadeild LSH.  Læknir verður á neyðarvakt á HSS og mun sinna neyðartilvikum.  Ef neyðartilfellli ber að höndum á að hringja strax í 112, sem hefur samband við lækni á neyðarvakt.

Ljóst er að grípa verður til fleiri aðgerða á næstunni.  Vonast er til að ráðuneytið geti brugðist fljótlega við þessari erfiðu fjárhagsstöðu og fjárhagsgrunnur stofnunarinnar verði leiðréttur svo koma megi í veg fyrir erfiðleika af svipuðu tagi í framtíðinni.“

Ólöf Guðný hættir störfum

 

 

Ólöf Guðný Valdimarsdóttir, fráfarandi aðstoðarmaður borgarstjóra, segir í Fréttablaðinu í dag að þau borgarstjóri hafi ekki verið sammála um áherslur á viðfangsefni. Ólöf Guðný lætur af störfum sem aðstoðarmaður borgarstjóra nú um mánaðarmótin.

 

Ólafur F. Magnússon borgarstjóri segir ekkert liggja fyrir um hver taki við af henni en það komi í ljós á næstunni. “Stærsta verkefnið er að gera borgarbúum grein fyrir öllu því sem við höfum gert,” segir Ólafur.

 

“Við vorum ekki sammála um áherslur á viðfangsefni,” hefur blaðið eftir Ólöfu Guðnýju þegar það spyr hvort trúnaðarbrestur hafi orðið milli þeirra borgarstjóra. Hún segist að öðru leyti ekki vilja tjá sig um orsakir starfslokanna.

Borgarstjóri neitar ágreiningi við fráfarandi aðstoðarmann sinn. „Ólöf Guðný mun starfa áfram með meirihlutanum að skipulagsmálum eins og hún hefur gert frá upphafi,” segir Ólafur. “Hún nýtur fulls trausts og virðingar.”

Ólöf Guðný verður áfram í skipulagsráði borgarinnar fyrir hönd F-lista. “Ólafur fór þess á leit við mig að ég sæti áfram í skipulagsráði. Vegna mikils stuðnings sem ég hef fundið frá meirihluta og minnihluta og ekki síst eindreginna óska formanns ráðsins hef ég fallist á að sitja þar áfram um óákveðinn tíma,” segir Ólöf. Ólöf Guðný er arkítekt að mennt og gerir ráð fyrir að hverfa aftur til fyrri starfa á teiknistofu sem hún hefur rekið um árabil.

Missti vinnu og fannst óþægilegt að strax var ljóst að þetta var ég.

Birnir Orri Pétursson og Lucia Celesta Molina Sierra krefjast 3,5 milljóna króna í miskabætur í meiðyrðamáli sínu gegn umsjónar- og ábyrgðarmönnum Kastljóss.

Aðalmeðferð í málinu fór fram í Héraðsdómi Reykjavíkur í gær.

Birnir og Lucia eru sonur og tengdadóttir Jónínu Bjartmarz, fyrrverandi umhverfisráðherra. Þau stefndu Páli Magnússyni útvarpsstjóra, Þórhalli Gunnarssyni, Jóhönnu Vilhjálmsdóttur, Sigmari Guðmundssyni og Helga Seljan vegna umfjöllunar Kastljóss um óvenju greiða afgreiðslu á íslenskum ríkisborgararétti Luciu. Björn og Lucia telja umfjöllun þáttarins hafa verið ærumeiðandi og brot á friðhelgi einkalífs þeirra.

Hin stefndu kröfðust öll sýknu.

Fréttablaðið fjallar um málið í dag: Birnir og Lucia sögðu að umfjöllunin hefði komið illa við þau persónulega og Birnir taldi hana hafa verið óvandaða. “Ég átti bágt með að trúa þessu. Ég hélt að þetta væri misskilningur sem yrði leiðréttur,” sagði hann. “Þetta var eins og herför gegn mömmu minni og hafði brag æsifréttamennsku. Ég var sár að fjölskyldan mín fengi klíkustimpil á sig - eins og hún væri hafin yfir lögin.”

Umfjöllunin kom illa við Luciu. “Við tókum þetta óskaplega nærri okkur. Mér fannst óþægilegt að það væri strax ljóst að þetta væri ég. Mér fannst þeir nota mig til að ná til Jónínu. Ég missti vinnu vegna þessa því margir trúðu umfjölluninni. Ég fann fyrir tortryggni frá fólki,” sagði hún.

Kastljóssmenn lögðu hins vegar áherslu á það í dóminum að umfjöllunin hefði ekki beinst að persónu Luciu, heldur að vinnubrögðum stjórnmálamanna. “Við vorum ekki að fjalla um Luciu og Birni, heldur um meðferð valds og veitingu ríkisborgararéttar sem er ákaflega heilagur réttur. Þetta snerist um það hvernig stjórnmálamenn og embættismenn fara með vald sitt,” sagði Sigmar Guðmundsson. Fréttamennirnir vísuðu á bug ásökunum um að málið hefði átt sér pólitískar rætur. “Það er fjarstæðukennt,” sagði Helgi Seljan.

Norðmenn hafa áhyggjur af umskurði afrískra kvenna í landinu!

Gambísk hjón hafa verið ákærð í Noregi fyrir limlestingu á kynfærum dætra sinna sem þau létu umskera í Gambíu. Á fjórum árum hafa um 500 konur leitað til sérstakrar deildar sem rekin er fyrir umskornar konur á norsku sjúkrahúsi.

Lögreglan í Noregi segist hins vegar fá tilkynningar reglulega um umskurð á stúlkum sem framkvæmdur er í Noregi. Í samfélagi fólks af afrískum uppruna í Osló hafa lengi heyrst áhyggjur af því að afrískar stúlkur sem fæðast og alast upp í Noregi séu umskornar í landinu. Konur, sem stunda umskurð á konum og eru búsettar í Bretlandi, Hollandi og Sómalíu, munu samkvæmt upplýsingum þessa fólks ferðast reglulega til Noregs í þeim tilgangi að gera slíkar aðgerðir.

“Það er full ástæða til að taka þessar raddir alvarlega,” segir á vg.no.

“Það streyma jafnt og þétt til okkar upplýsingar um umskurð í landinu,” segir Kristin Rohde, yfirmaður sérdeildar í lögreglunni.
“Við höfum líka heyrt að fólk innan okkar eigin heilbrigðisþjónustu stundi umskurð á konum, sem okkur þykir enn alvarlegra.”

Á sjúkrahúsinu í Ullevål er sérstök deild fyrir umskornar konur. Þar hefur verið umtalsverð aukning kvenna sem leita til deildarinnar, en í allt hafa 500 konur leitað til deildarinnar sem opnaði árið 2004.